ការងារឯករាជ្យ (Freelance jobs) បានផ្ដល់​ឱកាសដ៏ច្រើនមិនគួរឲ្យ​ជឿ ប៉ុន្តែសម្រាប់តែបុគ្គលទាំងឡាយណា ដែលប្ដេជ្ញាចិត្តផ្លាស់ប្ដូរខ្លួន ចាប់តាំងពីដំណាក់កាលមិនទាន់ចេះអ្វីសោះ រហូតក្លាយជាអ្នកជំនាញម្នាក់ក្នុងការងារឯករាជ្យ និង​ព្យាយាម ប្រឹងប្រែង​បន្ថែមជំនាញ ពង្រឹងសមត្ថភាព កសាងបទពិសោធ និងយកចិត្តទុកដាក់លើភាពរីកចម្រើនផ្ទាល់ខ្លួនប៉ុណ្ណោះ ។

មនុស្ស​ភាគច្រើន​តែងតែយល់ថា ការងារនេះជាការងារ​ដែល​គ្រាន់តែរៀន​ចប់ ​គឺអាចរកចំណូលបាន​មហាសាល​ ។ ប៉ុន្ដែ​អ្វី គ្រប់យ៉ាងមិនដូចការគិតនោះទេ ។ វា​ទាមទារ​ឲ្យ​មានការតស៊ូ​ព្យាយាម​ និងបន្ដ​អភិវឌ្ឍខ្លួន​ឥតឈប់ឈរ​រហូត​ដល់ ដំណាក់កាល​មួយ​ ដែល​អ្នក​ធ្វើការងារ​ត្រឹម២-៣ម៉ោង ក៏អាចយកបានលើសពី ២០០-៣០០​ ដុល្លារ ។

សៀវភៅនេះ​ ត្រូវបានសរសេរឡើងដើម្បីធ្វើជាមគ្គុទេសក៍ បង្ហាញផ្លូវ​ដល់អ្នក​ ឲ្យឆ្លងកាត់ដំណាក់កាលសំខាន់ៗចំនួន៤៖

ដំណាក់កាលទី១៖ កសាងជំនាញ

នៅក្នុងដំណាក់កាលនេះ ជាដំណាក់កាល​ដែល​អ្នក​ត្រូវផ្ដោតទៅលើការកសាងមូលដ្ឋានគ្រឹះ និងជំនាញចាំបាច់សម្រាប់​អាជីពការងារឯករាជ្យរបស់អ្នក​ ។ ប្រសិនបើអ្នក​ពិតជាចង់ធ្វើការងារឯករាជ្យ​តែអ្នកមិនទាន់មានជំនាញអ្វីមួយច្បាស់លាស់ អ្នក​នឹង​ត្រូវចាប់ផ្ដើមពីចំណុចនេះគឺ​ការកសាងចំណេះដឹង និងជំនាញ (SKILLS) ។

ដំណាក់កាលទី២៖ កសាងបទពិសោធ

បន្ទាប់​ពីអ្នកទទួលបានជំនាញចាំបាច់រួចហើយ​ ជំហានបន្ទាប់គឺ អ្នក​ត្រូវ​កសាងបទពិសោធពិត ក្នុង​អាជីវកម្ម​ជាក់ស្ដែង ។ អ្នក​នឹង​ត្រូវស្វែងយល់ពីការចាប់ភ្ញៀវជាលើកដំបូង, កសាងកម្រងស្នាដៃការងារ (Portfolio), កសាងយីហោផ្ទាល់ខ្លួនរបស់អ្នក​ក្នុងសហគមន៍អ្នក​ធ្វើការងារឯករាជ្យដូចគ្នា ។

ដំណាក់កាលទី៣៖ កសាងបំណិនអាជីព

ក្រោយ​ពី​អ្នក​មាន​បទពិសោធការងារ​ក្រាស់ក្រែលហើយ វា​ដល់​ពេល​ដែល​អ្នក​ត្រូវ​បំប្លែងបទពិសោធ​របស់អ្នក​ឲ្យក្លាយទៅជា បំណិនប្រសប់ ។ បើអ្នក​ធ្វើការងារកាន់តែជំនាញ និង​ លឿនរហ័ស នោះអ្នក​ក៏នឹងអាចទទួល​បាន​ថ្លៃសេវាកម្មកាន់តែខ្ពស់ ។ ដំណាក់កាលនេះ រាប់បញ្ចូល​ទាំងការពង្រឹងគុណភាពសេវាកម្ម ការរៀបចំលំហូរការងារឲ្យមានប្រសិទ្ធភាព ការគ្រប់គ្រងចំណូល​ចំណាយ ស្វែងយល់ពីកត្តាច្បាប់ និងកត្តារដ្ឋបាល។

ដំណាក់កាលទី៤៖ កសាងប្រាក់ចំណូល

នៅពេល​ដែល​អ្នក​មាន​របស់សំខាន់ទាំង៣(ជំនាញ បទពិសោធ និងបំណិន) វាដល់ពេល​ដែល​ត្រូវកសាងប្រាក់ចំណូល​តាម​ដែល​អ្នក​ចង់បាន​ហើយ ។ អ្នក​នឹង​ត្រូវរៀបចំផែនការទីផ្សារ​សម្រាប់​សេវាកម្មរបស់អ្នកដូចជា ថែរក្សាអតិថិជន ការកសាងចំណូល​ច្រើនច្រក និងបន្ដរក្សាចំណូល​ឲ្យបាន​យូរអង្វែង ។